ಸೊಭಾಣಾಂ (- ಆನ್ಸಿಟಾ ಒಶಿನ್ ಡಿಸೋಜ್)

[ಕವಿತಾ] ಸೊಭಾಣಾಂ (- ಆನ್ಸಿಟಾ ಒಶಿನ್ ಡಿಸೋಜ್)

ದೀಸ್ ಗೆಲ್ಲೆಪರಿಂ ಸಾಮಾಜಿಕ್ ಮಾಧ್ಯಮಾಚ್ಯಾ ಪ್ರಭಾವಾನ್ ಮನ್ಶಾನ್ ಅಪ್ಲಿ ಜಿಣಿ ತಶೆಂಚ್ ಸಂಸ್ಕೃತಿ ಸಯ್ತ್ ಏಕ್ ವಿಡಂಬನ್ ಕಶೆಂ ಕೆಲಾಂ. ಮತಿಕ್ ಆಯಿಲ್ಲೆಂ, ತಾಳ್-ಮೂಳ್ ನಾತ್ಲೆಂ ಅಪ್ಣಾಂವ್ಕ್ ವೆಚೆಂ ಏಕ್ ಫೆಶನ್ ಕಶೆಂ ಕರ್ನ್ ಘೆತ್ಲಾಂ. ಆನಿ ದಾಕವ್ಣೆಚ್ಯಾ ವಿಪರ್ಯಾಸಾಂತ್ ಕಾಂಯ್ ಇಲ್ಲಿ ಸಮ್ಜಣಿ ಆಸ್ಚೊ ಲೋಕ್ ಹ್ಯಾ ಸೊಭಾಣಾಂನಿ ಹಾಜರ್ ಜಾಯ್ತ್ ಜಾಲ್ಯಾರ್ ಹ್ಯಾ ಹಜಾರ್-ಲಾಖಾಂನಿ ಘೆಂವ್ನ್ ಆಯಿಲ್ಲ್ಯಾಂಕ್ ಊಟ್-ಬಸ್ ಕರ್ನ್ ದಿಂವ್ಚಿ ಸಜಾ ಕಾಂಯ್ ಉತ್ರಾಂವ್ಚಿ ನ್ಹಯ್. ಹಾಂಕಾಯ್ ಬೂದ್ ನಾ ಆನಿ ಹಾಂಕಾ ತೊ ಹಜಾರಾಂನಿ-ಲಾಖಾಂನಿ ದಿಂವ್ಚಾಂಕ್ ಕಶೀಯ್ ನಾ. ಪುಣ್ ಹ್ಯಾ ದುಡ್ವಾಚ್ಯಾ ಗರ್ವಾನ್ ಹೊ ಭೊಂಗೊಸ್ತೊಳ್ ಕರ್ಚೊ ಕೊಣಾಚ್ಯಾ ಸುಖಾಕ್ ಮ್ಹಳ್ಳೆಂ ಸರ್ವೆಸ್ಪರ್ ದೇವ್ ಸಯ್ತ್ ನೆಣಾಸ್ತಲೊ.

ಆನ್ಸಿಟಾ ಒಶಿನ್ ಡಿಸೋಜ್ ಮೂಡ್‌ಬೆಳ್ಳೆಚೆಂ ಏಕ್ ಕೊಂಕಣಿ ತಾಲೆಂತ್, ಬೊಳೀಯೆಚ್ಯಾ ಫಿರ್ಗಜ್ ಪತ್ರಾಚೆರ್ ಬರಂವ್ಕ್ ಸುರ್ವಾತ್ ಕರುನ್ ಉಪ್ರಾಂತ್ ನೇಮಾಳ್ಯಾಂನಿ ತವಳ್ ತವಳ್ ಲೇಖನಾಂ, ಕವಿತಾ ಬರವ್ನ್ ಆಯ್ಲಾಂ. ಬಿ.ಕೊಮಾಂತ್ ಧಾವೆಂ ರೇಂಕ್ ಹಿಣೆಂ ಆಪ್ಣಾಯ್ಲಾಂ, ಸಾಂ.ಲುವಿಸ್ ಕೊಲೆಜಿಚ್ಯಾ ಕೊಂಕಣಿ ಸಂಸ್ಥ್ಯಾಥಾವ್ನ್ ಕೊಂಕಣಿಚೆರ್ ಸ್ನಾತಕೋತ್ತರ್ ಡಿಪ್ಲೋಮಾ ಆಪ್ಣಾಯ್ಲಾಂ, ಸಿ.ಎ.(ಚಾರ್ಟರ್ಡ್ ಎಕೌಂಟೆಂಟ್) ಜಾವ್ನ್ ’ಡೆಲೋಯ್ಟ್’ ಕಂಪ್ಣೆಂತ್ ಕಾಮ್ ಕರ್ನ್ ಆಸಾ. ಹಿಚೆಂ ಪಯ್ಲೆಂ ಕವಿತೆಚೆಂ ಪುಸ್ತಕ್ ’ತಾಳೊ’ ಹೆಚ್ ವರ್ಸಾಂತ್ ಲೊಕಾರ್ಪಣ್ ಜಾಲಾ. ಬಾಯ್ ಆನ್ಸಿಟಾ ಥಾವ್ನ್ ಕೊಂಕಣಿ ಸಾಹಿತಿಕ್ ಶೆತಾಂತ್ ಬರೊ ಫುಡಾರ್ ಆಶೆತಾಂ.

[ಕವಿತಾ] ಸೊಭಾಣಾಂ (- ಆನ್ಸಿಟಾ ಒಶಿನ್ ಡಿಸೋಜ್)

ಸೊಭಾಣಾಂ

ವಿಶಾಲ್ ದರ್‍ಯಾಚ್ಯಾ ತಡಿರ್,

ಕಾರ್‍ಯಾಚಿ ಏಕ್ ಮಾಂಚಿ ಸೊಭ್ತಾ;

ಶಾಂತ್ ನಿಶ್ಶಬ್ದ್ ತಳಾರ್,

ಬ್ಯಾಂಡಾ ವಾಜ್ಪಾಚೊ ನಾದ್ ಗಾಜ್ತಾ;

ಆಪ್ಲ್ಯಾಂಚೆಂಚ್ ಸಾಲಾಂತ್ಲೆಂ ಕಾರ್‍ಯೆಂ ಲೆಕಿನಾಸ್ತಾಂ,

’ಬೀಚ್ ಸೈಡಾ’ಚ್ಯಾ ಸೊಭಾಣಾಕ್ ಲೋಕ್ ಪಾವ್ತಾ;

ಸಂಸ್ಕೃತಿ ಮಾಣ್ಸುಗಿ ದೆಕಾನಾಸ್ತಾಂ,

’ವೆಸ್ಟರ್ನ್’ ಪೊದಾಂಚ್ಯಾ ತಾಳಾಕ್ ನಾಚ್ತಾ;

ಕಸಲೊ ಅಲಂಕಾರ್, ಕಸಲೆಂ ಆಡಂಬರ್,

ಕಾರ್ಯೆಂ ನಿರ್ವಾಹಕ್‌ಚ್ ಲಾಖಾಂನಿ ವ್ಹರ್‍ತಾ;

ಯಥೇಷ್ಟ್ ಜೆವಾಣ್, ಮಾರ್ಗಾಯೆಚೆಂ ಪೀವನ್,

ಲೋಕ್ ಧಾದೊಶಿ, ತಾಳಿಯೊ ಪೆಟ್ತಾ;

ಸಾಲಾಂತ್ ಚಲ್ತಾ ಕಾರ್ಯೆಂ ದಸ್ತುರೆ ಪ್ರಕಾರ್,

ಬೀಚಾಂತ್ ’ಇವೆಂಟ್ ಪ್ಲ್ಯಾನರಾ’ಚೆಂಚ್ ಕಾರ್‍ಬಾರ್;

ಫುಡ್ಲೆಂ ಜೊಡೆಂ ಸಂತೊಸಾನ್ ಘರಾಶಿಂ ಮೆಟಾಂ ಕಾಡ್ತಾ,

ದರ್ಯಾ ದೆಗೆಚೆಂ, ಸಂಭ್ರಮಾನ್ ಬೊಂಗ್ಲ್ಯಾಕ್ ಚಲ್ತಾ;

ಸವ್ಯಾ ಮ್ಹಯ್ನ್ಯಾಂತ್ ಮಧ್ಯಮ್ ಜೊಡೆಂ,

ದರ್ಯಾ ವೆಳೆರ್ ಮಧುರ್ ಘಡಿಯೊ ಖರ್ಚಿತಾ,

ತೆಚ್ ರೆವೆರ್ ಲಗಿನ್ ಜಾಲ್ಲೆಂ ಗಿರೆಸ್ತ್ ಜೊಡೆಂ,

ಕೊಡ್ತಿ ಸಾಲಾಂತ್ ವೆಗ್ಳಾಚಾರಾಕ್ ಝಗಡ್ತಾ!

- ಆನ್ಸಿಟಾ ಒಶಿನ್ ಡಿಸೋಜ್ [ಎಪ್ರಿಲ್, 2025]

ಆನ್ಸಿಟಾ ಒಶಿನ್ ಡಿಸೋಜ್: ಮೂಡ್‌ಬೆಳ್ಳೆಚೆಂ ತಾಲೆಂತ್, ಬಿಕೊಮಾಂತ್ ರೇಂಕ್ ಆಪ್ಣಾಯ್ಲಾಂ, ಸಾಂ.ಲುವಿಸ್ ಕೊಲೆಜಿಚ್ಯಾ ಕೊಂಕಣಿ ಸಂಸ್ಥ್ಯಾಥಾವ್ನ್ ಪಿಜಿ ಡಿಪ್ಲೋಮಾ ಕರುನ್ ಚಾರ್ಟಎರ್ಡ್ ಎಕೌಂಟೆಂಟ್ ಜಾವ್ನ್ ’ಡೆಲೋಯ್ಟ್’ ಕಂಪ್ಣೆಂತ್ ಕಾಮ್ ಕರ್ನ್ ಆಸಾ. ಫಿರ್ಗಜ್ ಪತ್ರಾಂನಿ ಸುರ್ವಾತ್ ಕರುನ್ ಕೊಂಕಣಿ ನೆಮಾಳ್ಯಾಂನಿ ಸಯ್ತ್ ಲೇಖನಾಂ, ಕವಿತಾ ಬರಂವ್ಚಾ ಹಿಚೆಂ ಪಯ್ಲೆಂ ಕವಿತೆಚೆಂ ಪುಸ್ತಕ್ ’ತಾಳೊ’ ಪರ್ಗಟ್ಲಾಂ.