ಸಾವ್ಳಿ

[ಕವಿತಾ] ಸಾವ್ಳಿ 

ಹ್ಯಾ ಕವಿತೆಂತ್ ಸಾವ್ಳಿ ಆಸಾ, ಆನಿ ತ್ಯಾ ಸಾವ್ಳೆನ್ ಮನಶಾಕ್ ವೆವೆಗಳ್ಯಾ ಹಂತಾರ್ ಶಿಕಂವ್ಚಿಂ ಸಭಾರ್ ಲಿಸಾಂವಾಂ ಆಸಾತ್. ಸಾವ್ಳೆಕ್ ರಂಗ್ ಲಾಭ್ಚಿ ಇಮಾಜ್ ಖರಿಚ್ ಜಾವ್ನ್ ಅಮೂರ್ತ್ ಇಮಾಜ್ ಮ್ಹಳ್ಳೆಪರಿಂ ದಿಸತ್ ಪುಣ್ ಹ್ಯಾ ಇಮಾಜೆಪಾಟ್ಲಿ ಕಾಣಿ ಖರಿಚ್ ಜಾವ್ನ್ ಅಪುರ್ಭಾಯೆಚಿ. ಕವಿತೆಚ್ಯಾ ಎಕೆಕಾ ವಳಿಂಚ್ಯಾ ಎಕೆಕಾ ಸಬ್ಧಾಚೊ ಮಹತ್ವ್ ಸಮ್ಜುಂಕ್ ಹಿ ಕವಿತಾ ಜರೂರ್ ವಾಚಿಜಾಯ್. ಎಕೇಕ್ ಪಾವ್ಟಿಂ ವಾಚ್ತಾನಾ ಎಕೇಕ್ ಪಿಂತುರ್ ಉಭಿಂ ಕರುನ್ ವೆಚಿ ಹಿ ಕವಿತಾಚ್ ಏಕ್ ಸೊಭಾಯ್. ಅಶೆಂ ಮ್ಹಣುನ್ ’ಮ್ಹಜ್ಯಾ ರುಕಾರ್ ಗಾಂವ್ಚ್ಯೊ ಸರ್ವ್ ಕೊಗುಳ್ಯೊ, ಮ್ಹಜ್ಯಾ ಸಾವ್ಳೆಂತ್ ನಾಚ್ ಫಕತ್ ಮೊರಾಂಚೊ, ಇತ್ಲೆಂಚ್ ಕಿತ್ಯಾಕ್ ಹಾಂವ್ ಮಾತ್ರ್ ರೂಕ್ ಗಂದಾಚೊ - ಬಾಕಿಚೆ ಪುರಾಯ್ ರೂಕ್ ಬಿಬ್ಯಾಚೆ, ಹೆರಾಂಚ್ಯಾ ರುಕಾಂಚೆರ್ ಬಸ್‌ಲ್ಲೆ ಪುರಾಯ್ ಕಾವ್ಳೆ, ಹೆರಾಂಚ್ಯಾ ರುಕಾಂಚ್ಯಾ ಸಾವ್ಳೆಂನಿ ನಾಸ್ಚೆಂ ಘುಗಿಂನಿ’ ಮ್ಹಳ್ಳೆಂ ರುದಾಯ್ ಹಾಂವ್‌ಯೀ ಕರುಂಕ್ ಗೆಲೊಂ ತರ್ ಅಸಲ್ಯೊ ಕವಿತಾ ಕಾಂಯ್ ಕೊನ್ಶಾರ್‌ಚ್ ಉರ್ತಿತ್ ಜಶೆಂ ಜಾಯ್ತ್ಯಾ ಕವಿಂಕ್ ಸಯ್ತ್ ಕೊನ್ಶಾರ್ ದವರ್ಚೆಪರಿಂ.

[ಕವಿತಾ] ಸಾವ್ಳಿ 

ಮ್ಹಜಿ ಸಾವ್ಳಿ, ಅಸ್ತಾ ಮ್ಹಜ್ಯಾ ಬಗ್ಲೆನ್

ಸದಾಂಚ್ ಮ್ಹಾಕಾ ಜೋಡ್ನ್.

ಅಸ್ತಿತ್ವಾಚೊ ಉಗ್ಡಾಸ್ ಕಾಡುನ್.

ಮ್ಹಜೊ ಅನ್ಬೋಗ್ ಮ್ಹಜೆಂ ಅಸ್ತಿತ್ವ್.

ಅನ್ಬೋಗಾಚಿ ಸಾವ್ಳಿ ಚಿಂತ್ಪಾಕ್ ಖೊಂಕ್ತಾನಾ,

ರುತಾಂ ಜಾತಾ ವ್ಯಕ್ತಿತ್ವ್.

ಮ್ಹಜೆಂ ವ್ಯಕ್ತಿತ್ವ್ ಉತ್ರಾಂನಿ ದಿಸ್ತಾ.

ಉತ್ರಾಂಚಿ ಸಾವ್ಳಿ ಚಿಂತ್ಪಾಕ್ ಪೊಸ್ತಾ,

ಕಿತೆಂ.... ಸಾವ್ಳೆಚ್ಯಾ ಉಜ್ವಾಡಾಂತ್ ಚಲ್ತಾ?

ಸಾವ್ಳಿ ಲಾಂಬ್, ಮಟ್ವಿ, ಬಾರಿಕ್ ವಾ ಮೊಟಿ.

ಚಲ್.. ಚಲ್ಲ್ಯಾರ್ ಬದಲ್ತಾ ಸಾವ್ಳೆಚೆಂ ರೂಪ್,

ದೀವ್ನ್ ಉಜ್ವಾಡಾಕ್ ಗುಮಾನ್!

ಮ್ಹಜಿ ಸಾವ್ಳಿ, ಸಾಂಗಾತ್ ವಾ ಅಕಾಂತ್

ಹಾಂವ್ ಮುಖಾರ್ ವಾ ಸಾವ್ಳಿ

ನಿರ್ದಾರ್ ಕರ್ತಾ.. ಉಜ್ವಾಡಾಕ್ ದಿಂವ್ಚೊ ಮಾನ್!

[ಜುಲಾಯ್, 2020]