ರಸ್ತ್ಯಾದೆಗೆಚೆಂ ಫುಲ್ [ಡಯಾನಾ ಶರಲ್‌ ಲೋಬೊ]

[ಕವಿತಾ] ರಸ್ತ್ಯಾದೆಗೆಚೆಂ ಫುಲ್  [ಡಯಾನಾ ಶರಲ್‌ ಲೋಬೊ]

ನಿಬಾಕ್ ಫಕತ್ ರಸ್ತ್ಯಾ ದೆಗೆಂತ್ಲೆಂ ಏಕ್ ಫುಲ್, ಪುಣ್ ಉತ್ರಾಂ ಉತ್ರಾಂನಿ ಸಮಾಜೆಚ್ಯಾ ಕಿರ್ಕೊಳ್ ಮನ್ಶಾಂಚಿಂ ಮುಖ್ಡಿಂ ಉಗ್ತೆಂ ಕರ್ನ್ ವೆಚಿ ಹಿ ಕವಿತಾ ಪರತ್ ವಾಚುಂಕ್ ಕರ್ಚಿ ಅಪುರ್ಭಾಯೆಚಿ ಕವಿತಾ. ಸಮಾಜಿಕ್ ವಿಡಂಬನಾಂಚೆಂ ಮಾರ್ಮಿಕ್ ಚಿತ್ರಣ್ ಹ್ಯಾ ಕವಿತೆಂತ್ ದಿಸುನ್ ಯೆತಾ ಆನಿ ಹೆಂ ಚಿತ್ರಣ್ ವೆಳಾಕಾಳಾಕ್ ಸರಿ ಜಾವ್ನ್ ಅಪ್ಲೆಂ ರೂಪ್ ಬದ್ಲುನ್ ಜಿಯೆತಾ ಆನಿ ಮನಿಸ್ ಅಜೂನ್ ದೊಳೆ ಆಸುನ್ ಕುಡ್ಡೊ ಜಾವ್ನ್ ಜಿಯೆತಾ.

ಬಾಯ್ ಡಯಾನಾ ಶಾರಲ್ ಲೋಬೊ ಏಕ್ ವಯ್ಚಾರಿಕ್ ಚಿಂತ್ಪಾಚಿ, ಪ್ರಸ್ತುತ್ ದುಭಯ್ ಶೆರಾಂತ್ ವಸ್ತಿ ಕರುನ್ ಆಸಾ, ಕೊಂಕಣಿ ತಶೆಂಚ್ ಇಂಗ್ಲಿಶ್ ಆನಿ ಹೆರ್ ಭಾಸೆಂತ್ಲೆಂ ಸಾಹಿತ್ಯ್ ಸಯ್ತ್ ವಾಚ್ತಾ. ಸಾಂಕೇತಿಕತಾ (Symbolism) ವ್ಹಾಪ್ರುನ್ ಬರಯಿಲ್ಲಿ ಹಿ ಕವಿತಾ ವಾಚ್ಪ್ಯಾಚ್ಯಾ ಮತಿಂತ್ ಲಾಂಬ್ ಕಾಳ್ ಪರ್ಯಾಂತ್ ಉರ್ಚಾಂತ್ ದುಭಾವ್ ನಾ. ಬಾಖಿಚೆಂ ಮೆಜುಂಕ್/ಮಾಪುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ರಸ್ತ್ಯಾದೆಗೆಚೆಂ ಫುಲ್  [ಡಯಾನಾ ಶರಲ್‌ ಲೋಬೊ]

ರಸ್ತ್ಯಾದೆಗೆಚೆಂ ಫುಲ್

ರಸ್ತ್ಯಾದೆಗೆಚೆಂ ಸೊಭಿತ್ ಫುಲ್ ತುಂ

ದೆಕುನ್ ಸಬಾರಾಂಕ್ ತುಜೆರ್ ಅಬ್ಲೆಶಿ ಮೋಗ್

ರಸ್ಮಳ್ಯಾ ಕೆಸಾಂಕ್ ಆನಿ ಮ್ಹೊಂವ್ ತೊಂವ್ಚ್ಯಾ ವೊಂಟಾಂಕ್

ಗಿಮೆ-ದಿಸಾಂನಿ ಮೋಲ್ ಮಾತ್ರ್ ವೀಸ್.ದಿರಾಮ್

ತಾಂಬ್ಡ್ಯಾ ದಿವ್ಯಾಂಚೊ ಸಂಸಾರ್ ನ್ಹಯ್ ತುಜೊ

ತಾಂಚಿ ಪೊಜ್ಡಿ ಭಾಸ್ ತುಂ ನೆಣಾಂಯ್

ಗಿರಾಯ್ಕಾಂಕ್ ಅಪಯ್ನಾಂಯ್

ತರೀ ತುಂ ಥಂಯ್ಸರ್ ಜಿಯೆತಾಯ್!

ಶೆಣಾರ್ ಬಸ್ಚ್ಯಾ ಮುಸಾಂ ಪರಿಂ

ಕುಡಿಕ್ ತುಜ್ಯಾ ಲಾಲೆತಾತ್ ದಾದ್ಲೆ

ಅಂಗಾ ವಯ್ಲಿ ಸುತಾಂ ವೊಡುಂಕ್

ದರಗ್ ಬೊಟಾಂನಿ ಕೂಡ್ ತುಜಿ ಚೆಂಚುಂಕ್

ಜವಾಬ್ದಾರೆಚೆಂ ಖಜಾನ್ ಭರ್ಚ್ಯಾಕ್

ಸಾಂಡುಂನ್ ಭರ್ವಸೊ ಜಿವಿತಾಚೊ

ಥೊಡ್ಯಾಂ ಪಯ್ಶ್ಯಾಂ ಖಾತಿರ್ ಪರ್ಕಿ ಗಾಂವಾಂತ್

ವಿಕ್ತಾಯ್ ಕೂಡ್, ವೀಸ್ ದಿರಾಮಾಕ್!

- ಡಯಾನಾ ಶರಲ್‌ ಲೋಬೊ  [ಫೆಬ್ರೆರ್, 2025]

ಡಯಾನಾ ಶರಲ್‌ ಲೋಬೊ: "ಡಿ ಎಸ್‌ ಪಿ" ನಾಂವಾನ್‌ ಕೊಂಕ್ಣೆಂತ್‌ ಬರಂವ್ಚಿ ಡಯಾನಾ ಶರಲ್‌ ಲೋಬೊ, ವಾಲೆನ್ಸಿಯಾಚಿ. ವೃತ್ತೆನ್‌ ನರ್ಸ್. ವಾಚಪ್‌, ಪಯ್ಣ್‌ ಆನಿ ಸಿನೆಮಾ ತಿಚೆ ಹವ್ಯಾಸ್. ವಾವ್ರಾಕ್‌ ಲಾಗುನ್‌ ಪ್ರಸ್ತುತ್‌ ದುಬಾಂಯ್ತ್‌ ವಸ್ತಿ ಕರ್ತಾ. ಕನ್ನಡ ಆನಿ ಇಂಗ್ಲಿಶ್‌ ಭಾಸಾಂನೀಯ್‌ ಬರಯ್ತಾ̤.