ಡೊ. ಎಡ್ವರ್ಡ್ ಎಲ್ ನಜ್ರೆತಾಚ್ಯಾ ಕಥೆಂನಿ ಮೊರ್ನಾಂ ಆನಿ ತತ್ವಗಿನ್ಯಾನ್

ಡೊ. ಎಡ್ವರ್ಡ್ ಎಲ್ ನಜ್ರೆತಾಚ್ಯಾ ಕಥೆಂನಿ ಮೊರ್ನಾಂ ಆನಿ ತತ್ವಗಿನ್ಯಾನ್

ಕೊಂಕಣಿಂತ್ಲೊ ನಾಮ್ನೆಚೊ ಕಥಾಕಾರ್ ಡೊ.ಎಡ್ವರ್ಡ್ ಎಲ್. ನಜ್ರೆತ್ ವೃತ್ತೆನ್ ಏಕ್ ಸರ್ಜನ್ ಡೊಕ್ಟೊರ್. ದೆಕುನ್ ಮನ್ಶಾಚಿ ದೂಕ್, ವ್ಹಳ್ವಳೆ, ಜಲ್ಮ್, ಜಿವಿತ್ ಆನಿ ಮೊರ್ನ್ ಹ್ಯಾ ಸರ್ವಾಂ ಮಧೆಂ ಮನ್ಶಾ ಸಂವೇದನಾಂ ಭೋವ್ ಬಾರೀಕ್ಸಾಯೆನ್ ಪಳೆವ್ನ್ ಆಯಿಲ್ಲೊ ಕಥಾಕಾರ್. ಹಾಚ್ಯಾ ಕಥೆಂಕ್ ವಿವಿಧ್ ರಿತಿಂನಿ ವಾಚ್ಯೆತ್. ಸಮಾಜಿಕ್ ಚಿಂತ್ಪಾಚ್ಯಾ ನದ್ರೆನ್ ಹ್ಯೊ ಕಥಾ ಕಾಂಯ್ ಎಕಾ ಸಮಾಜೆಚ್ಯಾ ಪ್ರಸ್ತುತ್ ಘಡಿತಾಂ/ಘಟನಾಂಚೆರ್ ಆರ್ಸೊ ಧರ್ಚ್ಯೊ ಮ್ಹಣ್ ದಿಸ್ತಿತ್. ಪುಣ್ ಗುಂಡಾಯೆನ್, ತತ್ವಗಿನ್ಯಾನ್ ನದ್ರೆನ್ ಹ್ಯಾ ಕಥೆಂನಿ ಭೋವ್ ಅಪುರ್ಭಾಯೆನ್ ಮೊರ್ನಾಂ/ವ್ಹಳ್ವಳೆ ಆನಿ ಹಾಚಿಂ ವಿವಿಧ್ ರುಪಾಂ ದಾಕಂವ್ಚೆಂ ಪ್ರೇತನ್ ಕೆಲ್ಲೆಂ ದಿಸೊನ್ ಯೆತಾಂ. ಜಲ್ಮ್ ಆಮ್ಕಾಂ ಅಸ್ತಿತ್ವ್ ದಿತಾ. ಜಿವಿತ್ ಆಮ್ಕಾಂ ತೆಂ ಸಮ್ಜೊಂಕ್ ಎಕ್ ಆವ್ಕಾಸ್ ದಿತಾ, ಆನಿ ಮೊರ್ನ್ ಆಮ್ಕಾಂ ತೊ ಆವ್ಕಾಸ್ ಥಿರ್ ನ್ಹಯ್ ಮ್ಹಣ್ ಆಟವ್ಣಿ ಕರುನ್ ದಿತಾ. ಮೊರ್ನ್/ವ್ಹಳ್ವಳೆ ಕಸಲ್ಯಾ ಪ್ರಕಾರಾಚೆ ಆಸುಯೆತಾ?

ವ್ಹಳ್ವಳೆ, ದೂಕ್ ವಾ ಮೊರ್ನಾಂಚಿಂ ವೆವೆಗ್ಳಿಂ ರುಪಾಂ, ಡೊ.ಎಡ್ವರ್ಡ್ ಎಲ್. ನಜ್ರೆತಾಚ್ಯಾ ಎಕೆಕಾ ಕಥೆಂನಿ ದಿಸ್ತಾತ್. ಥೊಡ್ಯಾಂಚೊ ಉಲ್ಲೇಕ್ ಕರ್ಚೊ ತರ್; 
ಭವ್ತಿಕ್ ಮೊರ್ನ್: ಕುಡಿನ್ ಭಗ್ಚೆಂ, ಮ್ಹಳ್ಯಾರ್ ಪಿಡೆಂತ್, ಭುಕೆಂತ್, ತಾನೆಂತ್, ಉತರ್ ಪ್ರಾಯೆಂತ್. 
ಭಾವನಾತ್ಮಕ್ ಮೊರ್ನ್: ಆಮ್ಚಿಂ ಭಗ್ಣಾಂ, ಉಮಾಳೆ ಆನಿ ಆಶಾ-ಅತ್ರೆಗಾಂನಿ ಭಗ್ಚೆಂ ಮರಣ್ ಮ್ಹಳ್ಯಾರ್ ಎಕ್ಸುರ್ಪಣ್, ದಖೊ, ನೆಗಾರ್ಪಣ್, ತಿರಸ್ಕಾರ್ ಅಸಲ್ಯಾಂತ್ ಭಗುಂಕ್ ಮೆಳ್ಚೆಂ. 
ಮನೊವೈಗ್ಯಾನಿಕ್ ಮೊರ್ನ್: ದೊಳ್ಯಾಂಕ್ ದಿಸಾನಾಸ್ಚೊ ಮಾನಸಿಕ್ ಸಂಘರ್ಷ್ ಮ್ಹಳ್ಯಾರ್ ಖಂತ್, ಕಾವ್ಜೆಣಿ, ನಿರಾಸಪಣ್, ಲೆಕಾವರ್ತಿ ಕಾಳಜಿ ಕರಚೀ. 

ಸಾಮಾಜಿಕ್ ಮೊರ್ನ್: ಸಂಬಂಧಾಂನಿ, ದುಬ್ಳಿಕಾಯ್, ವರ್ಗ್-ಅಂತಸ್ಥ್ ಭೆದ್, ಆವ್ಮಾನ್. 

ಕುಟ್ಮಿಕ್ ಮೊರ್ನ್: ಕುಟ್ಮಿಕ್ ಭಾಂದಾಂನಿ ಫುಟ್, ಬಾಲ್ಯಪಣಾಚೆರ್ ನಿರ್ಲಕ್ಷಾ, ವ್ಹಡಿಲಾಂ ಥಾವ್ನ್ ಮೆಳಾನಾತ್ಲೊ ಮೊಗ್. 
ಆಪ್ತಾಂಚ್ಯಾ ವೆಗ್ಳಾಚಾರಾಚೆಂ ಮೊರ್ನ್: ಆಮಿ ಚಡ್ ಮೊಗ್ ಕೆಲ್ಲಿಂ ಆಮ್ಚೆಥಾವ್ನ್ ಮೊರ್ನಾಂತ್ ವಾ ತಿರಸ್ಕಾರಾಂತ್ ವೆಗ್ಳಾಚಾರ್ ಜಾತಾನಾ ಭಗ್ಚಿ ದೂಕ್. 
ಆರ್ಥಿಕ್ ರಿತಿಚೆಂ ಮೊರ್ನ್: ದುಡು, ಬೆಕಾರ್ಪಣ್, ರೀಣ್, ದಿಸ್ಪಡ್ತೊ ಗ್ರಾಸ್ ಜೊಡುಂಕ್ ಭಗ್ಚೆಂ ದೂಕ್. 
ಅಸ್ಥಿತ್ವವಾದಿ ಮೊರ್ನ್: ಜಿವಿತಾಂತ್ ಉದ್ದೇಶ್ ಕಸಲೊ? ಆಮಿ ಕಿತ್ಯಾಕ್ ಜಿಯೆತಾಂವ್, ಜಿವಿತಾಂತ್ ದೂಕ್ ಆನಿ ವೆಗ್ಳಾಚಾರ್ ಯೆಂವ್ಚೊ ಕಿತ್ಯಾಕ್ ಮ್ಹಳ್ಳಿಂ ಚಿಂತ್ನಾಂ. 

ನಯ್ತಿಕ್ ಮೊರ್ನ್: ಅತ್ಮೊ, ಅಂತರಮನ್, ವಿಂಚವ್ಣ್, ಜವಾಭ್ದಾರಿ ಜೆದ್ನಾಂ ಹೆರಾಂಕ್ ದುಕಯಿಲ್ಲ್ಯಾಚೊ, ಹೆರಾಂಕ್ ದಖೊ ದಿಲ್ಲ್ಯಾಚೊ ಪರಿಣಾಮ್ ಜಾವ್ನ್  ಸ್ವತಾ ಭಗ್ಚಿ ದೂಕ್. 
ಅಸಹಾಯಕ್ಪಣಾಚೆಂ ಮೊರ್ನ್: ಸಮಾಜೆಂತ್ ಬದ್ಲುಂಕ್ ಅಸಾಧ್ಯ್ ಜಾಲ್ಲ್ಯಾ ಸಂಗ್ತೆಂಚೆರ್ ಭಗ್ಚೆ ಕಳ್ವಳೆ ಆನಿ ದೂಕ್.

ಡೊ.ಎಡ್ವರ್ಡ್ ಎಲ್ ನಜ್ರೆತ್ ಉಂಚ್ಲೆಂ ಶಿಕಪ್ ಜೊಡ್ಲಲೊ ಪುಣ್ ಭೋವ್ ಸಾದೊ ಆನಿ ಮೊಗಾಳ್ ಮಿತ್ರ್. ಸಮಾಜೆಂತ್ ಕಿತ್ಲೆಶೆಕಿ ತಾಂಚ್ಯಾ ಸ್ವತಾಚ್ಯಾ ಭಲಾಯ್ಕೆಚಿ ವಾ ತಾಂಚ್ಯಾ ಕುಟ್ಮಾಚ್ಯಾ ಸಾಂದ್ಯಾಂಚ್ಯಾ ಭಲಾಯ್ಕೆಚಿ ಜೊಕ್ತಿ ಸಲ್ಹಾ ಘೆಂವ್ಕ್ ಕುಮೊಕ್ ವಿಚಾರ್ತಾತ್ ಆನಿ ಡೊಕ್ಟರ್ ಎಡ್ವರ್ಡ್ ಕೆದಿಂಚ್ ನೆಗಾರ್ ಕೆಲ್ಲೊ ನ್ಹಯ್.

ಹಾಚೆಂ ಅನ್ಯೇಕ್ ಖಾಶೆಲೆಂಪಣ್ ಮ್ಹಳ್ಯಾರ್ ಹೊ ಎಕ್ ಬರೊ ವಾಚ್ಪಿ. ಡೊ.ಎಡ್ವರ್ಡ್ ಎಲ್. ನಜ್ರೆತಾಚ್ಯೊ ಕಥಾ ಕೊಲೆಜಿಂನಿ ಅಧ್ಯಯನಾಕ್ ಯೋಗ್ಯ್ ಜಾಲ್ಲ್ಯೊ ಕಥಾ. ಆಶಾವಾದಿ ಪ್ರಕಾಶನಾನ್ ೨೦೨೪ ಇಸ್ವೆಂತ್ ಚಲಯಿಲ್ಲ್ಯಾ ರಾಷ್ಟ್ರ್ ಮಟ್ಟಾಚ್ಯಾ ಕಥಾ ಅಧ್ಯಯನಾಚ್ಯಾ ಶಿಂಕಳೆಂನಿ ’ಮೃಗಜಳ್’ ಪುಸ್ತಕಾಚ್ಯಾ ಕಥೆಂಚೆರ್ ಪಾಂಚ್ ಪ್ರಪತ್ರಾಂ ಸಾದರ್ ಜಾಲ್ಲಿಂ. ತೆಚ್‌ಪರಿಂ ’ಗೋಲಿಮಾರ್’ ಕಥೆಂಚೆರ್ ಸಯ್ತ್ ಅಧ್ಯಯನ್ ಚಲ್ಚಿ ಗರ್ಜ್ ಆಸಾ. ಕೊಂಕಣಿಂತ್ ’ಸಮಗ್ರ್ ಕೊಂಕಣಿ’ ಮ್ಹಳ್ಳೆಂ ಚಿಂತಪ್ ಸೊಂಪೆಂ ನ್ಹಯ್. ತೆಂ ಚಿಂತಪ್ ಚಿಂತುಂಕ್ ವಿಶಾಲ್ ಮನಾಚಿ, ಗುಂಡಾಯೆಚ್ಯಾ ಚಿಂತ್ಪಾಚಿ ಗರ್ಜ್ ಆಸಾ. ಫಕತ್ ’ಆಮ್ಚೊ ಫಾಯ್ದೊ’ ಚಿಂತುನ್ ಆಮ್ಕಾಂ ಜಾಯ್ ಜಾಲ್ಲೆಂ ಕರ್ನ್ ತಾಕಾ ’ಕೊಂಕಣಿ ಸೆವಾ’ ಮ್ಹಣ್ ದಾಂಗ್ರೊ ಮಾರ್ಚ್ಯಾ ಮೂರ್ಖಪಣಾಚ್ಯಾಕಿ, ಡೊ. ಎಡ್ವರ್ಡ್ ಎಲ್. ನಜ್ರೆತ್ ತಸಲ್ಯಾ ಉತ್ತೀಮ್ ಕಥಾಕಾರಾಂಚ್ಯೊ ಕಥಾ ಪಯ್ಲೆಂ ಆಮಿಂ ವಾಚುನ್, ಸಮ್ಜೊನ್ ಘೆತಲ್ಯೊ ತರ್ ಗಮ್ತಲೆಂ, ಹ್ಯೊ ಕಥಾ ಭಾರತಾಚ್ಯಾ ಖಂಚ್ಯಾಯ್ ಭಾಸೆಂನಿ ತರ್ಜಣ್ ಜಾಂವ್ಕ್ ಸೂಕ್ತ್ ಕಾಲ್ಲ್ಯೊ ಕಥಾ.

ಕೊಂಕಣಿ ಕಥೆಂನಿ ವೆಗ್-ವೆಗಳೆ ಪ್ರಯೊಗ್

1943 ಇಸ್ವೆಂತ್ ಆರ್. ಕೆ. ನಾರಾಯಣಾಚ್ಯಾ ’ಮಾಲ್ಗುಡಿ ಡೆಸ್’ ಕಥಾಸಂಗ್ರಹ್ ಭಾರತಾಂತ್ ಚಡ್ತಾವ್ ಭಾಸೆಂನಿ ತರ್ಜಣ್ ಜಾಲಾ, ಉಪ್ರಾಂತ್ ಶಂಕರನಾಗಚ್ಯಾ ನಿರ್ದೆಶನಾಖಾಲ್ 1986 ಥಾವ್ನ್ ಟಿವಿಚೆರ್ ಸೀರಿಯಲ್ ಜಾವ್ನ್ ಪ್ರಸಾರಿತ್ ಜಾಲ್ಲೆನಿಮ್ತಿಂ ಫಕತ್ ಭಾರತಾಂತ್ ಮಾತ್ರ್ ನ್ಹಯ್, ವಿದೆಶಾಂನಿ ಸಯತ್ ಪ್ರಸಾರ್ ಜಾವ್ನ್ ಹ್ಯೊ ಕಥಾ ಲೊಕಾಮೊಗಾಳ್ ಜಾಲ್ಯೊ. ಮಾಲ್ಗುಡಿ ಎಕ್ ಕಾಲ್ಪನಿಕ್ ಕಥಾ, ಆನಿ ತಾಂತ್ಲೆ ಪಾತ್ರ್ ಸಯತ್ ಕಾಲ್ಪನಿಕ್ ಪುಣ್ ಸಮಾಜೆಂತ್ ಘಡೊನ್ ಆಸ್ಚ್ಯಾ ಘಟನಾಂಚೆರ್ ಆಧಾರಿತ್ ಜಾವ್ನಾಸ್ಲೆ. ಹಾಚೆರ್ ಪ್ರೆರಿತ್ ಜಾವ್ನ್ ಕೊಂಕಣಿಂತ್ ೨೦೦೫ ಇಸ್ವೆಂತ್ ಮ್ಹಜೊಚ್ ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಮ್ಹಳ್ಳೊ ಕಥಾಸಂಗ್ರಹ್ ಕನ್ನಡ ಲಿಪಿಂತ್, ಆಶಾವಾದಿ ಪ್ರಕಾಶನಾಖಾಲ್ ಪರ್ಗಟ್ ಜಾಲ್ಲೊ. ಕುವೆಯ್ಟಾಂತ್ ಕಥಾಪಾಠ್ ಕಾಮಾಸಾಳಾಂತ್ ಹ್ಯಾ ಪುಸ್ತಕಾಚೆರ್ ಪ್ರಬಂಧ್/ಲೆಖ್ ಸಾದರ್ ಜಾಲಿಂ. ’ಕಂಗಾಲ್’ ಮ್ಹಳ್ಯಾರ್ ಗತ್-ಆಧಾರ್ ನಾತ್ಲೊ ವೆಕ್ತೀ. ’ಕುಕ್ಕೆಹಳ್ಳಿ’ ಎಕ್ ಕಾಲ್ಪನಿಕ್ ಗಾಂವ್, ಆನಿ ಕಥೆಂನಿ ಉದೆಲ್ಲೆ ಚಡ್ತಾವ್ ಪಾತ್ರ್ ನೀಜ್ ಘಟನಾಂಚೆರ್ ಆಧಾರಿತ್ ಜಾಲ್ಲೆ.

ಡೊ.ಎಡ್ವರ್ಡ್ ಎಲ್. ನಜ್ರೆತಾಚೊ ’ಗೊಲಿಮಾರ್’ 2010 ಇಸ್ವೆಂತ್ ಕನ್ನಡ ಲಿಪಿಂತ್ ಪರ್ಗಟ್ ಜಾಲ್ಲೊ ಪಾಂಚ್ವೊ ಕಥಾಜಮೊ ಸಯ್ತ್ ಅಸಲ್ಯಾಚ್ ಪ್ರಕಾರಾಚೊ. ಹಾಂಗಾಸರ್ ’ಗೊಲಿಮಾರ್’ ಎಕ್ ಕಾಲ್ಪನಿಕ್ ಗಾಂವ್, ಆನಿ ಹ್ಯಾ ಜಮ್ಯಾಂತ್ಲ್ಯಾ ಕಥೆಂನಿ ಆಸ್ಚೆ ಪಾತ್ರ್ ಸಯತ್ ಸಮಾಜೆಚ್ಯಾ ಘಡ್ಣುಕೆಚ್ಯಾ ಆಧಾರಾನ್ ಉದೆಲ್ಲೆ. ಡೊ. ಎಡ್ವರ್ಡ್ ಎಲ್, ನಜ್ರೆತ್ ಎಕ್ ಸರ್ಜನ್ ಡೊಕ್ಟೊರ್, ಜಿವಿತ್ ಆನಿ ಮರಣ್ ಹ್ಯಾ ದೊನ್ ಪೊಂತಾಂ ಮಧೆಂ ಚಿರ್ಡೊನ್ ಆಸ್ಚ್ಯಾ ಲೊಕಾಂಚಿಂ ಸಂವೆದನಾಂ ಭೊವ್ ಲಾಗ್ಶಿಲ್ಯಾನ್ ಪಳೆಂವ್ಚೊ, ಸಮ್ಜೊಂಚೊ. ದೆಕುನ್ ತಾಚ್ಯಾ ಎಕೆಕಾ ಕಥೆಂನಿ ಕಶೆಂ ಸಂಬಂಧಾಂಕ್ ಹ್ಯಾ ಸಂವೆದನಾಚ್ಯಾ ಸುತಾಂನಿ ರೆವ್ಡೊನ್ ಜಿಯೆತಾತ್ ಮ್ಹಳ್ಳೆಂ ಭೊವ್ ಮಾರ್ಮಿಕ್ ರಿತಿನ್ ಚಿತ್ರಣ್ ಕೆಲ್ಲೆಂ ಆಮಿ ಖೊಲಾಯೆನ್ ಅಧ್ಯಯನ್ ಕರ್ತಾನಾ ಗಮ್ತಾ. ಕೊಂಕಣಿಂತ್ ಭೊವ್ಶಾ ವೈದ್ಯಕೀಯ್ ಶೆತಾಚೆರ್ ಕಥಾ ಬರಂವ್ಚಾಂತ್ ಮ್ಹಾಕಾ ದಿಸ್ಚಿಂ ದೊನ್ ನಾಂವಾಂ ಮ್ಹಳ್ಯಾರ್ ಡೊ. ಎಡ್ವರ್ಡ್ ಎಲ್. ನಜ್ರೆತ್ ಆನಿ ದುಸ್ರೆಂ ಮೊನಿಕಾ ಡೆಸಾ ಮಥಾಯಸ್ ಡಬ್ಲಿನ್.

ಡೊ. ಎಡ್ವರ್ಡ್ ಎಲ್ ನಜ್ರೆತಾಚ್ಯೊ ಕಥಾ ಕನ್ನಡ ಭಾಸೆಂತ್ ತರ್ಜಣ್ ಜಾಲ್ಯಾತ್. 20ವ್ಯಾ ಶೆಕಡ್ಯಾಚ್ಯೊ ಕಥಾ (2006, ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ) ಪುಸ್ತಕಾಂತ್, ತಶೆಂಚ್ ಸುರ್ಯೊ ಉದೆತಾ ರಾಷ್ಟ್ರ್ ಮಟ್ಟಾಚ್ಯಾ ಕಥಾಸಂಕಲನಾಂತ್ ಪರ್ಗಟ್ ಜಾಲ್ಯಾ. ಸ್ವತಾಚ್ಯಾ ಮೊಟವ್ಯಾ ಕಥೆಂಚಿಂ ಸ ಸಂಗ್ರಹಾಂ ಕನ್ನಡ ಲಿಪಿಂತ್ ಪರ್ಗಟ್ ಜಾಲ್ಯಾಂತ್. ದೊನ್ ಡಿಜಿಟಲ್ ಆಡಿಯೊ ಪುಸ್ತಕಾಂನಿ ಪ್ರಸಾರ್ ಜಾಲ್ಯಾಂತ್. ದೊನ್ ಇ-ಪುಸ್ತಕಾಂನಿ ತಶೆಂಚ್ 2024 ಇಸ್ವೆಂತ್ ನಾಗರಿ ಲಿಪಿಂತ್ ’ಮೃಗಜಳ್' ಆನಿ ಹೊ ನಾಗರಿ ಲಿಪಿಂತ್ಲೊ ದುಸ್ರೊ ಕಥಾಸಂಗ್ರಹ್, ಸಮಗ್ರ್ ಕೊಂಕಣಿ ಕಥಾ ಅಧ್ಯಯನ್ ಕರ್ತೆಲ್ಯಾಂಕ್ ಹ್ಯೊ ಕಥಾ ಭೊವ್ ಉಪ್ಕಾರಾಕ್ ಪಡ್ತಲ್ಯೊ ಮ್ಹಣಚ್ಯಾಂತ್ ದುಭಾವ್ ನಾ.

[’ಗೊಲಿಮಾರ್-ಚ್ಯೊ ಕಥಾ’ ಪುಸ್ತಕಾಚೆರ್ ವಲ್ಲಿ ಕ್ವಾಡ್ರಸಾನ್ ಬರಯಿಲ್ಲೆಂ ಪ್ರಸ್ತಾವನ್]

ಡೊ. ಎಡ್ವರ್ಡ್ ಎಲ್. ನಜ್ರೆತಾಚಿಂ ಡಿಜಿಟಲ್ ಇ-ಪುಸ್ತಕಾಂ
ಮೃಗಜಳ್ (ಕನ್ನಡ ಲಿಪಿಂತ್)
ಮೃಗಜಳ್ (ನಾಗರಿ ಲಿಪಿಂತ್)

ಡೊ. ಎಡ್ವರ್ಡ್ ಎಲ್. ನಜ್ರೆತಾಚಿಂ ಡಿಜಿಟಲ್ ಆ-ಪುಸ್ತಕಾಂ
ಮೃಗಜಳ್ 
ಗೊಲಿಮಾರ್‌ಚ್ಯೊ ಕಥಾ